Arabako Foru Aldundiako Kultura Sailak eta Aramaioko Udalak antolatu dute IV. Uda Ikastaroa EHUren babesarekin. Izenburua izango da " Euskal Herria, 1789-1848, Historia, hizkuntza, artea" eta saioak Aramaioko kultur etxean egingo dituzte. Ikastaroaren antolatzaileen esanetan, Euskal Herriarentzat hain erabakigarria izan zen garaiaren ikuspegi zabala eskaintzea da aurtengo helburua. Horretarako hamalau aditu etorriko dira Aramaiora.
Askotariko gaiak
Landuko diren gaiak askotarikoak dira: Frantziako Iraultza eta 1848 arteko sasoia Ipar Euskal Herrian, euskarari buruzko ikerketak bi errepubliken arteko garaian edo arte plastikoak Araban, Bizkaian eta Gipuzkoan XVIII. mendearen hondarrean eta XIX.aren hasieran, besteak beste. Lau egunetan arratsaldetan izango dira saioak, bakoitzak 50 minutu inguruko iraupena izango du eta hiru hizkuntzatan eskainiko dira aldi bereko itzulpenarekin.
Aramaioko Uda Ikastaroa gaiarekiko interesa duen orori dago zuzenduta.