Oso pozik daude Aramaixo Tropikaleko Gazte Asanbladakoak bigarren eskuko liburu azokaren emaitzarekin. Liburu asko saldu dituzte: 250, entziklopedia bat barne; hala, diru dezente lortu dute: 380 euro (Angolara eramateko). Uste baino gehiago, antolatzaileetako baten, Alex Aginagalderen hitzetan. Halaber, kontatu digu nobelak baino entseguak saldu zituztela gehiago, baina batez ere, sukaldeko liburuak, etxeko erremedioen gainekoak, umeendakoak eta liburu zaharrak saldu zituztela. Esaterako, 1930eko liburuak ere bazirela esan digu.
Bestelako bitxikeriak
Kontatu digu, baita ere, liburu bitxiez gain, liburuen barruan dokumentu bitxiak ere agertu zaizkiela; esaterako, testamentu bat, 1978ko txartel bat (Seat 600 modeloko automobil bat zozketatzen) edo antzinako loteria txartel bat.
Kolonbiara eta Gasteizera Bestalde, saldu ez zituzten liburuen artean, 500 bat, espainierazkoak guztiak, Kolonbiara bidali nahi dituzte gazteek. Orain, Udalari laguntza eskatuko diotela esan digute, Diputazioaren bitartez liburuak Kolonbiara zelan bidali erabakitzeko. Saldu ez dituzten euskarazko liburuak, berriz, Gasteizko umezurztegi batera bidaltzea aztertzen dabiltza.
Azokan ibili zen herritar kopuruari dagokionez, aditzera eman digute asko ibili zela, batez ere, 13:00etatik aurrera.
Gauzak horrela, eta bestelako ustekaberik ezean, datorren urtean, azoka berriro antolatzeko asmoa dutela esan digute. gazteen partetik: eskerrik asko Bukatzeko, gazteek eskerrak eman nahi dizkiete aramaioarrei, liburuak ematearren eta azokari egin dioten harrerarengatik. Udalari eta liburutegiko arduradunari (Olgari) ere eskertu nahi diete egin duten guztia. Horrez gainera, sortutako eragozpenengatik barkamena eskatu nahi dute.