Erretiratuen Eguneko azoka egiten hasi zirenean, helburua zen herriko produktuen azoka egitea. Baina urteekin hori aldatuz joan da. Hala, gaur egun, dezente gehiago dira kanpotik datozen saltzaileak herrikoak baino. Iaz, adibidez, 25 saltoki ipini zituzten eta bederatzi bakarrik ziren Aramaiokoak. Horren aurrean, eta herritarren parte hartzea bultzatzeko asmoarekin, Udalak erabaki du aurten deialdi berezia egitea. Rosa Mondragonek esan digunez, besteak beste, dirulaguntzak emango dizkiete saltokia ipintzen duten herritarrei.
Goizetik arratsaldera arteko jaia
Hala, urriaren 30ean, goizean trikitilarien doinuek iragarriko dute Erretiratuen Eguna. Eta dagoeneko Nardeaga kalean gertu-gertu izango da azoka. 12:00etan, berriz, urtean hil diren erretiratuen aldeko meza esango dute parrokian. Horren ostean, Lagun Artean dantza taldekoek dantza erakustaldia egingo dute. Eta 14:30ean erretiratuendako bazkaria izango da, kiroldegian.
Rosa Mondragonek iragarri digu laster ipiniko dituztela salgai bazkarirako txartelak (sei euro). Euskadiko Kutxan edo Vital Kutxan erosi ahal izango dira, udaletxean bertan eta baita auzoetan ere. Izan ere, auzo-alkateei emango zaizkie saltzeko txartel batzuk. Bazkalostean dantzaldia eta opari banaketa izango dira.