Betiko moduan, baserritarren eta artisauen azokak erakarri zuen jende gehien. Baina, baita Erretiratuen Egunak berak ere. Parrokian bertan lagun dezente elkartu zen urtean hildako erretiratuen aldeko mezan. Lagun Artean taldekoek fin-fin egin zuten haien omenezko dantza-saioa mezaren ostean. Gero, azoka ikusi, antzinako kontuak esan eta kiroldegirantz egin zuten erretiratuek, bazkaltzera. 165 bat lagun elkartu zen han, iaz baino gehiago. Ondo bazkaldu eta gero, erromerian ibili ziren. Eta Vital Kutxaren eta Euskadiko Kutxaren opariak eman zizkieten 12 laguni.
Erretiratu nagusienak
Era berean, Ana Mari Jauregik (95 urte) eta Fidel Beitiak (91 urte) opari bereziak jaso zituzten, nagusienak izatearren.
Azokari dagokionez, handia izan zen; berritasunekin, gainera. Gozogintzarekin, tailarekin, eztigintzarekin lotutako saltokiekin batera, errementaritzarekin lotutako erakusketa egon zen. Hortaz, gauzak erosteaz eta ikusteaz gain, ikasteko aukera ere egon zen.