78. aldia beteko du Antiguako pilota txapelketak, eta guztira 18 bikotek parte hartuko dute, elite mailan, neskak eta mutilak, eta promes mailan, mutilak. Horien artean egongo da Aratz Ormaetxea pilotari bergararra.
Antzuolako jaialdian ligaxkako bi partidu jokatuko dituzte, 19:00etan hasita: promes mailan Uriarte-Galarza eta Ibarra-Canseco; eta elite mailan Lizeaga-Balerdi eta Irribarria-Garaño.
Bi partiduen artean Joseba Lezeta kazetaria omenduko dute. Erretiroa hartuta, pilotari egindako ekarpena eskertuko diote, txapelketaren antolatzaileek eta pilota zaleek.
Antiguoko frontoian
"Etxetik kanpora" egindako lehen jardunaldiaren ostean, Antiguoko txapelketa Antiguoko frontoira itzuliko da. Ligaxkako partiduak martitzenetan eta eguaztenetan jokatuko dira; baina, abuztuaren 12ko eklipsearengatik, aste horretan, astelehenean eta martitzenean izango dira.
Ligaxkaren ostean etorriko dira kanporaketak: abuztuaren 25ean eta 26an finalerdiak, eta 29an, finala.
Etxegarai, txapeldun
Oñatiko pilotari Madalen Etxegaraik iazko Antiguoko txapelketa irabazi zuen, Enara Gaminderekin bikote eginez, Zabaleta eta Mendiburu 22-20 menderatuz.