Arrola Mendizale Taldeak, esaterako, bihar abiatuko du Mendi Erronka, herriko txokoak ezagutarazteko. Eskaneatzeko kontrol-puntuak jarri dituzte herri-eskolan, San Josen, Kaxetan, San Martzialen, Trekutzen eta Arrolan, hainbat zozketatan parte-hartzea ahalbidetuz.
Ekainak 2an, martitzena, 18:30ean, Torresoroan, kirol egokituari buruzko mahai-inguruan egingo dute berba Xabat Askasibar pilotariak eta Joseba Azkarate txirrindulariak, Jon Balentziaga kazetariak dinamizatuta. Hilaren 5ean, gainera, Azkarate bera kide den Bizi Hadi talde inklusiboa aurkezteko eguna ospatuko dute Zurrategin, 17:00etan. Bertaratzen direnek atletismoko aulki zein handbikeak probatzeko eta sariak irabazteko hainbat zozketatan parte hartzeko aukera izango dute.
Gimnasia erritmikoari ere emango diote ikusgarritasuna, Naroa Perezek erakustaldia egingo baitu ekainaren 3an, eguaztena, 17:00etan, frontoian.
Bestetik, pilotazaleek hitzordu berezia izango dute ekainaren 4an, osteguna, 17:00etan, Antzuolako txapelketako finalekin.