Mantentze-lanetan ibili dira azken hilabeteetan Antiguako ermitan. 2025eko martxoan eman zuen aditzera herritar talde batek premiazko konponketak behar zituela, eta diru-bilketa kanpaina jarri zuten martxan, lanak hasi ahal izateko. Teilatuaren egoeran eta egurrez egindako egituretan jarri zuten arreta, eta eraikinaren biziraupenerako garrantzitsuak zirela azpimarratu. Orain, beharrezko konponketa guztiak eginda, itxura berria dauka.
Garrantzi handiko eraikina
Antiguako ermitak garrantzi handia du antzuolarrentzat, eta honela azaldu du konponketa-lanak martxan jarri zituen herritar taldeak: "Nahiz eta gizartea ikaragarri aldatu azken urteetan, herritarrok Antiguako ermitari dioten atxikimendua handia izaten jarraitzen duela sinesten dugu".
Ez da harritzekoa herritarrek ematen dioten garrantzia, Antiguakoa Antzuolako ermita zaharrena dela uste da eta: "Haren izenak adierazten duen moduan, gure herriak duen ermita zaharrena izan liteke Antiguakoa, herriko parrokia egin aurretik zutik zegoena. Lehen aipamen dokumentala 1503koa bada ere, bertan dagoen Andramari ederra XIV. mendekoa jotzen da".
