Armarriak eta sinboloak aztertzen dihardu azken urteotan Patxi Olabarriak. 2024an Gipuzkoako armarria, gure historiaren ispilu liburua argitaratu zuen, eta 2023an, ostera, Antzuolako armarriaren alardea izenekoa. Azaldu duenez, Euskal Herriko sinbolo gehiago ikertzen dabil gaur egun, eta iaz abiatutako Ipuscuaren milurtekoa ekitaldi sortaren harira, Landatxope jubilatu elkarteak hitzaldia egiteko eskatu zion, gai hori Antzuolara ekartzeko.
Bada, ostegunean egin dute hitzordua, eta hainbat bitxikeriari buruz jardungo duela aurreratu du: "Ipuscua nafar tenentziaren lehen aipamena 1025koa da, San Juan de la Peña monastegiko liburu batean dago jasota. Liburu horretantxe aipatzen da lehen aldiz ere Bergara bailara, Aritzeta ermita San Juan de la Peña monastegiari dohaintzan ematearen testuinguruan".
Garai hartan Antzuola baino Uzarraga herrixka existitzen zen, eta gizartea bailaratan antolatuta zegoen: "Gerora etorri ziren hiribilduak, XIII. mendean, Gaztelaren konkistarekin". Hain justu, espainiarrek sinboloak "ze ondo saltzen dituzten" ere izango du berbagai.