Eduki hau partekatzeko esteka arbelera kopiatu da.
Datorren zapatuan, hilak 24, leporaino beteko da, bazkalorduan, Olalde elkarte gastronomikoa. Ezohiko bertso-desafioa egingo dute Kaleko bertso eskolako kide Joxue Madariagak, Txomin Alberdik eta Jon Matak Andoni Egaña bertsolariarekin. "Bururatu zitzaigun eta harekin harremanetan jarri ginen. Ondo hartu zuenez, libre zeukan egun bat aukeratzeko eskatu genion", azaldu du Alberdik.
Hiru antzuolarrek Egañarekin neurtuko dute bertsotarako abilidadea, Iraia Gabilondo gai-jartzailearen esanetara. Sare sozialetatik zabaldu zuten ekitaldiaren kartela, eta erantzuna berehalakoa izan zen: "Ordubetean bete ziren bazkarirako toki guztiak, 60 inguru. Toki barik geratu baina bertso-saiora etorri gura dutenei esan diegu kafe-ordurako bertaratzeko".
Herriartekora begira
Bertso-desafioa Gipuzkoako III. Herriarteko Txapelketaren baitan kokatzen da. Madariagak, Alberdik eta Matak ordezkatuko dute Antzuola, eta prestaketa moduan hartuko dute Olaldekoa.
Bihar emango dituzte txapelketa horren xehetasunak, Villabonan, baina Alberdik jakinarazi du Debagoieneko kanporaketako finala Antzuolako gaztetxean izango dela.
