Herriko gaztetxoenek eman zioten hasiera San Esteban krosaren 2025eko edizioari. 5 urteko gelako, LH1-eko eta LH2-ko haurrek 300 metroko lasterketa egin zuten. Benjaminak eta alebinak izan ziren hurrengoak lehiatzen. Distantzia ezberdinetan lehiatu ziren, lehenek 500 metro egin behar izan zuten, eta bigarrenek kilometro bat. Infantilak, kadeteak eta helduak izan ziren azkenak parte hartzen. Hauek ere neurri ezberdinetan lehiatu behar izan zuten, lehen biek bi kilometro eta erdi egin behar izan zuten, eta azkenek berriz bost.
Jauregi eta Arregi azkarrenak
Lehen unetik giro polita izan zen herriko plazan, eta parte hartzaileak txalo eta oihu bidez animatzen zituzten bertaratutako herritarrek. Helduen lasterketan Jone Jauregi izan zen lehena emakumezkoen artean. Honen atzetik gelditu ziren Ane Garcia eta Ainize Lizarralde. Gizonezkoetan berriz, Mikel Arregi izan zen azkarrena. Lier Aranguren eta Unai Mondragonek osatu zuten podium-a honekin batera. Lehen antzuolarraren saria ere Jauregi eta Arregirentzat izan zen. Infantiletan Xabat Aiastui izan zen lehena, Garazi Aranburu eta Irati Sudupe honen ostean gelditu zirelarik.