Cristal Peak sarietarako epaimahaia trailera bideratutako komunikabideek, federazioetako ordezkariek eta zenbait profesionalek osatzen dute, eta abenduaren 2an erabaki zituzten aurtengo finalistak zeintzuk diren. Hala, guztira lau kategoria daude: 23 urtez azpikoak; distantzia motzeko lasterketak eta skyrunninga; distantzia ertaineko lasterketak; eta distantzia luzekoak. Larrea 23 urtez azpikoen sarirako hautagaietako bat da, eta beste finalistak dira Erresuma Batuko Tom Spencer eta Finlay Grant, Kantabriako Marcos Villamuera eta Bartzelonako Iu Net.
Larrearen aurtengo emaitzen artean Munduko Txapelketako 17. postua, Skyrun de Mournesko garaipena, Sobrescobio Redes Traileko bigarren postua, Zegama-Aizkorriko kilometro bertikaleko hirugarren postua eta Matheysinseko Skyraceko 7. postua nabarmendu dituzte.