Euskal Herrian harreman mota asko dago Israelekin, sionismoarekin, eta arrazoi eta interes ugari, berriz, harreman horiek ez eteteko, Palestinarekin Elkartasuna plataformako kideen hitzetan; bada, horietako batzuk aletu dituzte maiatzean aurkeztutako Israel hemen ere hasten da liburuxkan, eta Antzuolan aurkeztuko dute oraingoan: Izar Kortabarria eta Miren Txurrukaren eskutik, martitzenean, hilaren 21ean, izango da aurkezpena, 18:30ean, Olaranen. Antzuola-Palestina taldeak antolatutako ekintza da.
Hitzorduak, atzeratuta
Palestinaren aldeko mobilizazioak egin ziren eguaztenean, eta, ondorioz, bi hitzordu atzeratzeko erabakia hartu du Udalak: irakurle taldeari dagokionez, hilaren 22an egingo da, 18:30ean, liburutegian; Herri Curriculumaren lehendabiziko batzarra, berriz, 29an.