Ordubete, 37 minutu eta 35 segundo behar izan zituen antzuolarrak 20 kilometroko ibilbidea egiteko hilaren 11n, Irlandan, 1.300 metroko desnibelarekin, eta lasterketa "oso polita" izan zela adierazi du: "Igoera eta jaitsiera pila bat zituen, zati tekniko eta azkarrekin. Hasieratik hasi nintzen Tom Spencer izeneko lasterkari batekin, eta biok joan ginen hasieratik lasterketaren buruan ihes eginda; esango nuke lasterketaren erdia baino gehiago egin genuela elkarrekin. Azken aurreko igoeran, ordea, atzean laga ninduen pixka bat, eroriko bat ere izan nuen, baina sei kilometroren faltan esan zidaten minutu bat ateratzen zidala; hala, distantzia moztu nuen eta 300 metroren faltan harrapatu nuen, esprintean; azkenean, nik irabazi nuen".
Munduko Kopan bai, baina puntuatu gabe
Urriaren 26an, domeka, jokatuko da Skyrunning zirkuituko finala Asturiasen –17,5 kilometroko ibilbidea, 1.100 metroko desnibelarekin–, eta han izango da Larrea: "Joango naiz, lasterketan parte hartuko dut, baina sailkapen orokorrean ez naiz agertuko; izan ere, 23 urtez azpikoen kategorian hiru lasterketa egin behar ziren, baina bi bakarrik egin ditut puntuagarriak".