Ikasturtea hastear da Antzuolako irakurle taldea, eta Alaine Agirre idazlearen Euri eta ateri liburua izango da landuko duten lehendabiziko argitalpena, "euskal literaturako estilo eta ahots ezberdinak ezagutaraztea" baita helburua, Miren Zubikarai liburuzainaren hitzetan. "Hautaketa egitean, batetik, azken urteetan argitaratutako lan berriak izatea hartzen da kontuan, eta parte-hartzaileen proposamenak, bestetik; horrela ikasturtea orekatua izatea lortzen dugu, gai eta estilo anitzekin".
Eguaztenetan izango dira saio guztiak, ia hilabetero, eta honako hauek dira gainontzeko saioetan landuko dituzte liburuak: azaroan, Pleibak (Miren Amuriza); otsailean, Amorante frantsesa (Miren Agur Meabe); martxoan, Zoriona edo antzeko zerbait (Koldo Mitxelena); maiatzean, Bisita (Mikel Pagadi); eta azkenik, ekainean, aurrerago zehaztuko duten beste bat.
Saioen egitura
Saioetan, lehendabizi, parte-hartzaile bakoitzak bere inpresio pertsonala kontatzen du, irakurritako liburua oinarri hartuz, eta irakurketari buruzko gako batzuk ematen ditu ondoren Agirrek, bera baita dinamizatzailea. "Horrek elkarrizketa zabalagoa izatea ahalbideratzen du, bere rola garrantzitsua baita: irakurritakoa sakontzen laguntzen du, gai berriak proposatzen ditu eta eztabaida aberatsak sortu. Horrek guztiz bestelako esperientzia bihurtzen du saioa, eta irakurketak beste maila batera eramaten ditu parte hartzaileak". Zubikaraik, horrenbestez, argitu du saioak ez direla liburura mugatzen, "gaiek bizipen eta hausnarketa propioetara bideratzen dituztelako" parte-hartzaileak.
Irakurtzeko eta euskaraz aritzeko "gogoa" duten herritarrak biltzen dira batik bat saioetan, eta profilak "anitzak" dira: "Horrez gain, urtez urte nahiko egonkor mantendu da parte-hartzaileen kopurua, eta horrek erakusten du interesak jarraitzen duela. Aurpegi berriak ere beti daude, eta horrek freskotasuna eta ikuspegi berriak dakartza". Hala, Zubikaraik "irakurtzea gustuko duen edonor" animatu du saioetara, honako ohartarazpen hau eginda: "Ez da beharrezkoa literaturan aditua izatea: helburua da euskarazko liburuak irakurri eta horien inguruan hitz egitea".