Udalaren arabera, Iberdrolarekin hitz egin ondoren, "goi tentsioko lur azpiko linea bat matxuratu egin da Ibarre eta Antigua auzoetako transformagailuen artean", eta konponketa nola egin daitekeen baloratzen dabiltza une honetan. Bitartean, eta "behin-behinean", elektrosorgailu autonomoen bidez dabiltza bermatzen Antzuolako elektrizitate-hornidura; zehazki, sei gailu jarri dituzte. Horrenbestez, ohartarazi dute balitekeela argi-mozketak izatea tarteka; hala ere, ez dakite noiz arte luza daitekeen egoera, Iberdrolak ez baitu zehaztu iraupenaren epea.
Udalaren hitzetan, Iberdrolak jakinarazi duenez, "lehenago edo beranduago" gerta zitekeen gertaera bat da, Antigua auzoan erre diren kableak zaharkituta daudelako. Konponketarako, berriz, gaur-gaurkoz, bi aukera egon daitezke: berriak jarri edo lur osoa jaso linea osoa alda dezaten. Hala ere, Iberdrolak erabaki gabe du nola konpondu behar den arazoa.