Kirol Eguna ospatu dute gaur Antzuolan, eta kuadrilla galanta batu da eskolako patioan. Eta hori izan da nobedadea, orain arte futbol sailekoen jaia izan den horri ateak zabaldu dizkietela, eta beste kirol elkarte batzuetakoak ere batu zaizkiela. Olalde Pilota Elkartea eta Ariznoa Erritmika Elkartea aritu dira, batik bat, Kirol Eguna antolatzen, AKErekin batera, eta elkarrekin ez gaurko eguna bakarrik, aste barruan ere hainbat kirol hitzordu antolatu dituzte –argazkietan gaurko bazkariaz batera baita atzoko gimnasia erritmikoko erakustaldiko irudiak eta baita pilotakoak ere–. Hala, gaurkoak eman duenarekin pozik azaldu dira denak, eta badirudi ospakizun honek formatu berriari helduko diola aurerrantzean ere.
Larrea anaiendako errekonozimendua
Bazkalostean sari banaketa izan da, eta lehenik eta behin Aitor Aierbe eta Urtzi Murgia igo dira taula gainera, eta egindako lana aitortu die Pedro Iturbek. Ondoren gazte mailako futbol taldeko ordezkariak ere igo dira, ligan urte ona egin duten seinale, eta azkenik, Antzuolako alkate Olatz Lezetak kirolari nabarmenen sariak banatu ditu. Larrea anaiendako izan da saria, baina ezin izan dute herrian egon, kirol konpromisoak zituztelako, eta haien lehengusuek jaso dituzte oroigarriak.