Trenbideko hormetako bat egonkortzeko lanei ekin die aste honetan Gipuzkoako Foru Aldundiak, Seanto SL enpresaren bitartez, hainbat pitzadura baititu Zumetazpikoa baserriaren azpiko tunelaren eta Laskurainandi baserriaren artean dagoen hormetako bat. Emandako datuen arabera, hormak, zehazki, 70,5 metroko luzera du, eta 25 metro inguru daude pitzadurarekin eraginda; are gehiago, horma bide berderantz mugitzen ere hasia da.
204.739,56 euroko aurrekontua dute zehaztutako lanek, BEZa barne, eta Foru Aldundia da arduraduna. Haren hitzetan, egin beharrekoak hiru hilabeteko epean amaitzea aurreikusten dute, eta, horrenbestez, "asko jota eta sorpresarik ez bada", abuztu amaierarako amaituta izatea.
Bide alternatiborik ez
Lanek iraun artean itxita egongo da trenbideko tarte hori, eta Diputazioak azaldu du ez dutela beste alternatibarik zehaztu: "Trenbidea oraindik Gipuzkoako Bizikletabideen Katalogoan ofizialki txertatu gabe dago. Hori horrela, obrak dirauen bitartean ez da bide alternatiborik eskaintzeko beharrik ikusten".