Euskaraldia dela-eta, hamaikakoaren aurkezpena egin dute aste honetan Antzuolan, herriko kirolariekin osatuta. Batzuek, herriko kirol talderen baten izenean hartu dute parte, eta beste batzuek, berriz, maila pertsonalean. Kirol taldeei dagokienez, honako hauek dira ordezkarien izenak: Martin Legorburu, Elene Uribesalgo eta Xabier Insausti, Olalde Pilota Elkartetik; Sara Garitano eta Mikel Jauregi, AKEtik; Txomin Arzallus, Arrolatik; Unax Urzelai, Irain motor klubetik; Hodei Aranzabal, hockey taldetik; eta Ainize Lizarralde, Ariznoatik. Maila pertsonalean parte hartu duten kirolariak, berriz: Ibai Larrea korrikalaria eta Iraide Iraola eskiatzailea.
Hika ariketa, bihar
Domekan, hilaren 25ean, amaituko da Euskaraldia, eta azken txanpan sartuta daude antzuolarrak ere. Bihar, hilak 23, hika ariketa egingo dute gaztetxean, 18:30ean hasita. Antolatzaileek adierazi dutenez, hikaren erabileraren inguruan gogoeta bultzatzea izango da helburuetako bat, eta bideoak erabiliko dituzte horretarako; ondoren, merienda egingo dute gerturatzen direnen artean.
