Xabier Jauregirendako izan da Atzeko Txapelketako garaipena, bigarren urtez jarraian, Andoitz Aranbururen aurka "partidu oso estua" jokatu ondoren, antolatzaileen hitzetan. Hala, txapela ez ezik, Asier Insaustik eginiko egurrezko garaikurra etxeratu zuen, urtebeteko epean zaindu beharko duena: "Aurtengo berrikuntza izan da. Hurrengo urteko txapelketaren hasieran, bueltatu egin beharko du, hurrengo garaileari testigua pasatzeko".
8 eta 57 urte arteko 80 herritarrek hartu dute parte txapelketan, eta asteburuan bizitakoarekin gustura gelditu dira Olalde Pilota Elkarteko kideak: "Pilotari guztiak aritu dira giro jatorrean, eta etengabe ibili da jendea frontoiaren bueltan". Amaitzeko, gainera, pilotari guztien arteko afari merienda egin zuten elkartean.
