Euskal dantzen topaleku bilakatu da gaurkoan Antzuola, Debagoieneko Helduen Dantzari Eguna ospatzen baitabiltza. Bailarako 250 dantzari eta musikari elkartu dira, sei taldetakoak: Eskoriatzatik, Gorosarri; Aretxabaletatik, Leizarra; Arrasatetik, Lore Gazteak eta Txikitxu Arrostaitz; Oñatitik, Oñatz; eta Antzuolatik, Oinarin.
Dantza saioa izan da eguerdian, 12:00etan hasita, eta horrek izan du eguneko protagonismoa. Taldeek elkarrekin dantzatu dituzte euskal dantza tradizionaletako batzuk, eta, beste batzuk, banaka: Leizarrako kideek, Lapurdiko dantzak egin dituzte; Lore Gazteak taldeak, berriz, Arkupeian; Oñatzek, Beteluren fandangoa; Txikitxu Arrostaitzek, txantxoak; Gorosarrik, Scotish eta Galaiena; eta Oinarinek, azkenik, Te vi eta El culo paloteado. Amaitzeko, ohi den eran, larrain dantza egin dute dantzariek eta zenbait herritarrek elkarrekin.
2025eko Debagoieneko Helduen Dantzari Eguneko parte-hartzaileak. Irudia: Goiena.
Egunak, ordea, aurrera jarraituko du: dantza saioaren ondoren, poteoa izan dute, eta, ostean, bazkaria. Gauera arte luzatuko dute, gainera, ospakizuna, gaztetxea irekiko baitute herriko dantzariek.
