Olatz Insausti pilotariak, Nahia Bertiz bikotekidearekin batera, Marta Gomez eta Alize Sagardui izan zituen aurkari Promozio Mailako finalean asteburuan, baina adierazi du hasieratik aurrea hartu eta garaipena eskuratu zutela: "Egia esanda, askoz ere partida gogorragoa espero genuen, kontuan hartuta aurreko bi partiduak euren aurka galdu egin genituela. Azkar jarri ginen aurretik, batik bat, euren akatsengatik, eta sentsazio onak izan genituen, ez genbiltzalako ia ezertan huts egiten eta tantoak ondo bukatzen genituelako". Are gehiago, erantsi du "oso polita" izan dela partidua "hainbeste jenderen aurrean" jokatzea.
Insausti, ezkerretik hasita bigarrena, finalean. Irudia: Ados Pilota.
Insaustirendako, ordea, ez da egunotako hitzordu bakarra izan, beste bat izango baitu datorren domekan, apirilaren 6an, Oiartzunen: Master Cup txapelketako finalean izango da, promesen mailan, eskuz binakako pilota mistoan, Irati Betegi aretxabaletarrarekin batera.
