Elurretako erraketak, kranpoiak, pioletak, kaskoak, arnesak, ferrata bideak egiteko ekipamendua eta mendiko eskirako erreskate-kitak alokatzea du eskaintzatzat Arrola Mendizale Elkarteak; material bakoitzetik bina pieza, hain zuzen ere. Horrez gain, baita walkie-talkie sorta bat ere.
Doakoa da materialaren alokairua, baina erabiltzaileek baldintza batzuk bete behar dituztela azaldu dute batzordeko kideek: "Arrola Mendizale Elkarteko kidea izan behar da eta 18 urte baino gehiago izan behar dira; hala ezean, legezko tutorearen baimena behar da. Mendiko ekipamenduaren erabileraren oinarrizko ezagutza ere izan behar da". Eskaria egiteko, berriz, erabiltzaileek aurreikusitako jardueraren data baino hamar egun lehenago aurkeztu beharko dute eskaera, gutxienez, eta Arrolak gehienez ere bost eguneko epean erantzuteko konpromisoa hartzen du. Are gehiago, gehienezko alokairu-aldia zazpi egunekoa izango da, eta 50 euroko berme-gordailua –eskudirutan emana– utzi beharko da, materiala baldintza beretan itzul dadin.
Betebeharrak
Erabiltzaileek, hala ere, materialaren eskaria eginez gero, betebehar batzuk dituzte: "Materiala egoki eta bere erabilera espezifikorako erabiltzea, materialari aldaketarik edo konponketarik ez egitea, materiala hirugarren pertsona batekin ez partekatzea, alokairuan zehar izandako kalte edo galeraren berri ematea, eta jaso zen egoera berean itzultzea".
Eskaera eginez gero, hemen da galdetegia eta informazio zehatza.
