Hamaseigarren aldia du aurten Euskal Herriko Mus Txapelketak, eta hiru kanporaketa jokatuko dituzte aurtengoan Antzuolan: urtarrilaren 18an, zapatua, izango da lehendabizikoa, Okaldi tabernan, 16:30ean; hurrenez hurren, Mox tabernan (hilaren 19an) eta Koxkor okindegian (hilaren 26an) izango dira gainontzeko biak, ordu berean. Finalari dagokionez, otsailaren 2an izango da Gorosti tabernan.
Izen-ematea kanporaketen egun berean egingo dela azaldu dute antolatzaileek, ordu erdi lehenago irekiko baitute horretarako aukera, 20 euroren truke; itxi, berriz, jokoan hasi baino bost minutu lehenago. Txapelketa lau erregetara jokatuko da.
Sailkapenetatik finalera
Herriko irabazleak zazpi herrialdeetako finaletara joango dira: martxoaren 22an, zapatua, jokatuko dira. Handik, berriz, final nazionalera jauzi egiteko aukera izango dute, lehen postuen artean egonez gero: Zigoitian (Araba) jokatuko da, apirilaren 5ean.
