Sute batek Donamartiriko (Nafarroa Beherea) Arberoa ikastolako hiru eraikinetako zaharrena erre zuen urriaren 28an; teilatua eta barnealdea kiskali egin ziren eta kalte material handiak eragin zituen. Eta horri irtenbide bat emateko, elkartasun kanpaina bat abiatu dute, ikastola sostengatzea helburu: hemen da diru-ekarpena egiteko aukera. Horrez gain, kontu korronte bat ere jarri dute nahi duenaren eskura: FR76 1005 7195 2500 0202 0160 520.
Arberoa ibarreko ikasleak hartzen ditu barne ikastolak; tartean, hainbat aihertar. Kiskalitako eraikinari dagokionez, 200 metro koadroko prefabrikatu bat zen, eta bertan ziren, besteak beste, 3 eta 6 urte arteko haurren ikasgela eta irakasleen bilera-gela.
Herri Urrats
Peio Jorajuriak, Seaskako lehendakariak, iragarri du datorren urteko Herri Urrats Senpereko Kattalin Elizalde kolegioaren handitze lanak ordaintzeko aurreikusia zutela, baina, horrez gain, Arberoa ikastola sostengatzeko ere izango dela.
