Datorren astean ospatuko dira Antzuolako jaiak, baina lehenago motorrak berotzeko aukera izango dute herritarrek, ekintzak egingo baitira asteburuan. Zapatuan izango da lehenengo hitzordua, pilota jaialdia egingo baitute Udal Pilotalekuan, 19:00etan. Leire eta Nagore Galeano ahizpak izango dira protagonistetako bi, baina ez, ordea, antzuolar bakarrak, Olatz Insausti herrikidea izango baitute aurkari, Irati Betegirekin batera.
Manex Balerdi eta Aitor Mendizabal antzuolarren txanda izango da ondoren, Ander Muruaren eta Aitor Elizegiren aurkako partidua jokatuko baitute.
Domekan, bazkaria
Domekan, berriz, hilak 14, Landatxope jubilatu eta pentsiodunen elkarteak antolatuta, erretiratuen bazkaria egingo dute eskolako barruko patioan. 14:15ean izango da, eta dantza saioa ere izango dute. Are gehiago, ohikoa den eran, zapia jarriko diete bazkaltzen izango diren bi pertsona nagusienei.