Duela zortzi urte inguru antolatu zituzten azkenengo aldiz Ondarreko jaiak, eta, ordutik, ekintza solte batzuk salbu, ez dituzte ospatu. Hala ere, aurten, hiruzpalau auzotar elkartu dira festak errekuperatzeko asmoz, eta, aldi berean, baita herriari "bizitasuna" emateko ere. Hala, haien hitzetan, "herritar guztiei" zuzendutako egitaraua osatu dute, "haur, gazte zein helduek" goza dezaten.
Bihar hasiko dituzte jaiak. Umeentzako bizikleta ginkana egingo dute goizeko hamaiketan, Peña Aiastui elkartearen laguntzarekin; 17:00etan, berriz, Kiki, Koko eta Moko pailazoen ikuskizuna eta merienda izango dira. Iluntzean, helduagoen txanda izango da, AKE eguneko Elektrotxufla elektrotxaranga bukatutakoan Latxirongak DJak izango baitira musika jartzen; barra ere egongo da. Azkenik, prozesioa izango da domekan, 12:00etan; ondoren, dantza saioa, salda eta txorizoarekin.