Berrogei urte bete ditu aurten Aiherra (Nafarroa Beherea) eta Antzuola herrien arteko senidetzeak, eta ospakizun urtea dute herritarrek. Antzuolan apirilaren 13an, zapatua, ospatuko dute urtemuga bi herriek, baina motorrak berotzeko aukera izango da aurrez, Seguran (Gipuzkoa) izango baitira martxoaren 10ean, domekan, Iparra-Hegoa jaialdia dela eta.
11:00etan elkartuko dira aihertarrak eta antzuolarrak Seguran, eta Mugak zubi ibilbideko etapa bateko kilometro bat egingo dute elkarrekin; handik igarotzen dena, hain justu. Ondoren, Iparra-Hegoa jaialdiko ekitaldiekin egingo dute bat; esaterako, herri bazkaria izango da, Kuxkuxtuk alaituta; ondoren, Imuntzo eta Belokiren erromeria.
Hala, autobusa antolatu du Antzuolako Udalak: 10:30ean izango da irteera Sagasti auzotik eta 18:30ean itzulera. Martxoaren 1a da izena emateko azken eguna, eta bi modu daude horretarako: udaletxean edo udala@antzuola.eus helbidean. Bazkarirako ere eman daiteke izena; 20 euroko prezioa du.