Haurren heriotza, eta heriotza haurrekin, naturaltasunez eta humanitatez bizi izatea eta inguru gehienetan ematen den isiltasuna eta ezintasuna bistaratzea eta eraldatzea. Helburu hori dutela azaldu dute gaur goizean Donostian egindako aurkezpen ekitaldian Gehiago Gara ekimenaren bultzatzaileek. Hil Argi eta Bizipoza elkarteak dira ekimenaren sustatzaileak, eta laguntzaile dituzte Esku Hutsik, Bidegin eta Goiargi elkarteak eta baita Heriotza Haurrekin egitasmoa ere.
Aurkezpen ekitaldian ekimenaren manifestua irakurri dute, eta baita hainbat aitortza egin ere. Antzuolako Herri Eskolak jaso du horietako bat, azaldu dutenez hainbat urtetan doluaren eta heriotzaren pedagogia lantzeagatik. Nahikari Barrio, Silvia Ezpeleta eta Pilar Etxanizek jaso dute aitortza irudikatzen duen ikurra Goizargi Elkarteko ordezkari den Maddi Beltzaren eskutik.
Beste hainbat talde eta erakunderen lana ere jarri dute balioan gehiago gara ekimenekoek, besteak beste, Gurutzetako Pediatriako Etxeko Ospitalizazioko Unitatearena, Bilbo-Basurtuko Esiko jaiotza-dolurako lan-taldearena eta Pirritx, Porrotx eta Marimototsena.
