Udalak antolatuta, egubakoitzean, hilaren 24an, Akelarre ikuskizuna eskainiko du Oihulari Klown antzerki taldeak. Euren azken lana da, eta Virginia Imaz arduratuko da pertsonaia nagusia gorpuzteaz. Publiko gazte eta helduari zuzenduta dago, eta parodia inprobisatu bat da; hain justu, sorgin ikaslea da Pauxa, eta publikoarekin hartu-emana du ikuskizunean zehar. Doakoa da sarrera.
Zapatuan, berriz, hilaren 25ean, elkarretaratzea izango da 19:00etan, Andramanuelak emakume taldeak eta Udalak antolatuta, Herriko Plazan. Eta, ondoren, 20:00etan, Bilau taldearen kontzertua izango da, Torresoroan.
Bilau taldea
Ainhize-Monjolese (Nafarroa Beherea) herriko taldea da Bilau. Elorri Falxa –ahotsa eta baxua–, Paxkal Irigoien –ahotsa eta gitarra–, Xabi Etxeberri –biolina– eta Jeremi Garat –biolontxeloa– dira taldekideak, folk progresiboa egiten dute, eta 2016an kaleratu zuten euren lehen diskoa. Oraingoan, Antzuolan izango dira.
