30 urte baino gehiagoko ohiturari jarraituz, gaztaina erre eguna egingo dute domekan, arratsaldeko zazpietatik aurrera, herriko plazan. Gaztainekin batera, helduei sagardoa banatuko zaie eta haurrei, berriz, ura eta edari freskagarriak.
Urtez urte, boluntarioek erretzen dituzte gaztainak eta Antzuolako Udaleko kultura teknikari Jone Larrañagak adierazi du 100 kilo gaztaina erreko dituztela: "Erretzaileek borondatez egiten dute. Azken urteetan dabiltzanak dira Imanol Garmendia, Basilio Ormazabal eta Jose Mari Iturbe". Halaber, gogoan izan ditu urte hauetan guztietan gaztainak erretzen ibili, baina zendu diren Enrique Losada, Anjel Jauregi, Salvador Peña edota Juan Ramon Aranguren, besteak beste. Larrañagak aurreratu du ziurrenik egun hau zapatura aldatuko dutela datorren urtean.
Era berean, Anelkarrek adierazi du elkarteari laguntzeko herritarrek diru-ekarpena egin ahal izango dutela.
