Herriko komunikazio bideak "errazteko" asmoz jarri du pantaila digital informatiboa Antzuolako Udalak, herritarrekin loturak "estutu" eta komunikazioa "etengabe hobetzeko" xedea baitu, Olatz Lezeta alkateak azaldu duenez. "Gure helburua da herritarrak informatuta, inplikatuta, aktibo eta komunitatearekin lotuta sentitzea. Honetarako, badakigu herriko elkarteek egiten duten lana ere funtsezkoa dela. Hori dela eta, baliabide hau ere beraien esku jartzea garrantzitsua dela uste dugu".
Hain justu, informazio "garrantzitsua", ekitaldiak eta udal eguneraketak partekatzeko bide izan nahi du pantailak, "komunikazio plan globala hobetzeko ahalegina" egin dutela nabarmendu baitu Udalak. "Berrikusitako plan honek herritarrengana modu eraginkorragoan iristea du helburu, denek udal ekimenen, komunitateko ekitaldien eta parte-hartze aukeraren berri izan dezaten. Plan hau urratsez urrats ezarriko da".