Trekutz parke eolikoaren berri emateko asmoz, batzar irekia egingo du Antzuolako Udalak astelehenean, hilaren 30ean, Torresoroan, 18:30ean. Izan ere, Olatz Lezeta Antzuolako alkateak jakinarazi du pasa den astean batzarra egin zutela Capital Energy enpresarekin, Udalarekin harremanetan jarri ostean, eta adierazi zietela proiektuarekin aurrera egiteko asmoa dutela.
Hain justu, enpresak bi aerosorgailu instalatu nahi ditu Irimogainen: bata, Antzuolako lurretan, Meaka gainean; bestea, Urretxuko lurretan, Irimon.
Alegazio epea
Orain, alegazio epea zabalduko dela esan du Lezetak; hilabeteko epea egongo da horretarako. Udalak alegazioak jarriko dituela nabarmendu du, eta, beraz, egin ditzakeen urratsen berri emango du batzarrean. Hala ere, gaineratu duenez, Eusko Jaurlaritzako Ingurumen Sailak proiektua onartuz gero, enpresak aurrera egiteko eskumena du.
