Aiherra (Nafarroa Beherea) eta Antzuolaren arteko senidetza ospatzeko eguna dute zapatuan herritarrek, Antzuolan. 10:00etan egingo diete ongi etorria aihertarrei, eta hamarretakoa izango dute 10:30ean, indarrak hartzeko. 12:00etan, berriz, Amatxi Lezafi izeneko antzerkia ikusteko aukera izango da, Torresoroa aretoan. Hain justu, Aiherrako gazteek eginiko ikuskizun bat da, eta lehen aldiz aurkeztuko dute Antzuolan. 14:30ean bazkaria egingo dute eskolako patioan; ehun lagun inguru batzea espero da.
Kantua eta dantza
Ttipika taldearekin kantu eta dantza saioa izango da bazkalostean eta, egunari amaiera emateko, 22:00etan, Lizartxo talde oñatiarrarekin erromeria antolatu dute, gaztetxean. Amaitzeko, DJ Jo ta Txo arduratuko da musika jartzeaz.
Era horretan, harremanaren 39.urteurrena ospatuko dute, eta datorrenaren esperoan geldituko dira.
