Ekimenaren berri emateko helburuarekin, bisita gidatuak egin dituzte gaur liburutegian, Haur Hezkuntzako hiru urteko ikasleengandik hasi eta Lehen Hezkuntzako bigarren mailakoetara arte, Lur Korta ipuin kontalariaren gidaritzapean.
Ikasgela horietako bakoitzean motxila bat egongo da, eta astero ikaskide batek izango du horren ardura. "Gurasoekin joaten da liburutegira, gustuko duen liburu bat aukeratzera; normalean, Galtzagorri elkarteak gomendatutakoa. Pare bat egunetan etxean izaten du, eta, ondoren, haurrak ikasgelara eraman beharko du ikaskideekin konpartitzeko". Behin epea bukatzean, beste ikaskide batek ekingo dio zirkuituari.
Irakurle taldea
Euskarazko irakurle taldea ere martxan da, Alaine Agirre idazlearekin. Azaroaren 2an, eguena, izango da hurrengo hitzordua, 18:30ean, udal liburutegian, eta parte hartzaileek Aintzane Usandizagaren Zomorrotu lana irakurri beharko dute.
Kezkaren bat izanez gero, ordea, liburutegian eskuratu daiteke informazio gehiago. Bestela, beste bi bide ere jarri dituzte interesa duten herritarren eskura: liburutegia@antzuola.eus helbidea edo 673 905 438 telefono zenbakia.