Eskulan eta yoga ikastaroak gertu ditu kultura sailak. Biak ala biak, urriaren 3an hasiko dira, baina, aurrez, izena eman beharko da. Udaletxean dauden izen-emate orriak bete behar dira, hilaren 29a baino lehen.
Haurrak eta helduak
Eskulan ikastaroetan haurrendako (lehen mailatik gora) eta helduendako taldeak osatuko dira. Bina talde: haurrenak, eguaztenetan, 17:30-18:30 eta, eguenetan, 16:45-17:45; eta, helduenak, eguenetan, 14:45-16:30 eta 18:00-19:45. Haurren taldeetan 11 ume onartuko dituzte, gehienez. Kopurua gainditzen bada, zozketa egingo dute.
Eskulan ikastaroetako irakaslea Edurne Uribesalgo izango da, eta ekaineko hirugarren astean bukatuko dira.
Yoga eta gimnasioa
Yoga ikastaroan hiru talde osatuko dituzte, astean bitan eskolak hartzeko: martitzenetan eta eguenetan, 10:30-12:00, 17:00-18:35 eta 18:45-20:15. Ikastaroan erabiltzeko eta norberak eraman beharreko materiala izango dira arropa erosoa, esterila eta manta bat.
Azkenik, gimnasioko ate irekiak iraileko azken astean izango dira: 25etik 29ra.
- 60 urtetik gorakoentzako gimnasia: astelehena, 09:30ean.
- Pilates: astelehena, 17:30ean; martitzena, 10:30ean.
- Hipopresiboak: astelehena, 18:30ean; eguena, 10:30ean.
- Spinning: eguena, 09:30ean.
- Body tono: martitzena, 18:30ean.
- Zunba: eguena, 19:45etan.
Horrez gain, dagoeneko bada izena emateko aukera ere.
Antzerki eskolak
Udalak antolatzen dituen ikastaroez harago, badago antzerki eskolan parte hartzeko aukera. Martitzenetan emango dituzte antzerki eskolak: 18:15etik 19:30era haurrendako, eta 19:45etik 21:15era helduendako. Informazio zabalagoa eta izena emateko orriak www.dap.eus webgunean daude.