Maiatzaren 15a da San Isidro eguna, baina, ohi den legez, zapatuan ospatuko dute Antzuolan, maiatzaren 13an. Egun osoko egitaraua antolatu du Antzuolako Udalak, eta tartean, baita bazkaria ere. Bada, salgai daude dagoeneko txartelak.
Bi menu egongo dira aukeran. Entsalada mistoa, oilasko errea pikillo saltsarekin eta gorringo txigortu tarta jateko aukera egongo da ohikoan; beganoan, pistoa, hanburgesa beganoa eta konpota. Ogia eta edaria bietan dago barne, eta 20 euroko prezioa du. Umeentzako menua ere izango da: plater konbinatua eta gorringo txigortu tarta, 13,5 euroan. Liburutegian edo udaletxean daude txartelak.
Bertso saioa
Maiatzaren 12an bertso saioa egingo da, 22:00etan. Maialen Lujanbio, Aitor Bizkarra, Ane Zuazubiskar, Agin Laburu eta Alaia Martin izango dira bertsolariak, eta sarrerak Bibe plataforman eta liburutegian erosi daitezke hamar eurotan.
