Euskarazko film laburren zirkuitua da Laburbira, eta hogeigarren aldia du. 28 film aurkeztu dituzte, eta horietatik zazpi aukeratu dituztela jakinarazi du Euskaltzaleen Topaguneak, antolatzailea baita. Herriz herri emanaldiak egiten dabiltza martxoaren 6a ezkero, apirilaren 5era arte, eta, jakinarazi dutenez, hautatutako lanak gaur egungo zinemagintzaren "lagin apartak" dira.
Antzuolan ere zazpi lan horiez gozatzeko aukera izango da etzi, sortzaileen lana erakusteko asmoz: Maria Bartolomek, Erik Camposek eta Fernando Martinek Olatuen isiltasuna lana ondu dute; Marina Perosanzek, Muskil; Maider Oleagak, Irrits; Ane Cuestak, Asko falta da; Leire Egañak, Erlojupekoa; Josu Martinezek, Hitzak; eta Iulen Aranak, Koadro goriari heldu.