"Uzarraga auzoan dudan lursailean izan da. Pinudia bota ondoren, haritza sartzea erabaki genuen. Urtarrilean sartu nituen, haritzak eta baita astigar zuriak ere, platano faltsuak deiturikoak. Kontua da beste landaketa batzuk egin behar genituela, eta igo nintzen landareak eta tresnak eramatera. Orduan konturatu nintzen urtarrilean landatutako haritzak ez zeudela", dio Etxezarretak. Landaketa egin zuenetik ez da igo lursaila duen tokira; hortaz, ez daki noiz lapurtu dizkioten landareak. Argi duen bakarra da lapurreta egin duenak badakiela zertan zebilen: "Platano faltsuak atera dituzte lurretik, baina hemen utzi dituzte, ez dituzte eraman. Lapurtzera etorri denak bazekien zer nahi zuen".
Salaketa jarri du
Ertzain-etxera joan zen salaketa jartzera, eta ertzainak lekuan bertan izan dira argazkiak atera eta gertatutakoa ikertzen. "Nik uste dut hartara dedikatzen den norbait izan behar dela. Izan ere, partikular bat ez da lapurretan ibiliko. Dirulaguntzak lortzeko landatutakoaren fakturak aurkeztu behar dira eta", argitu du antzuolarrak. Nabarmendu du ez dela samurra lursailera iristea; autoz igotzen da Etxezarreta, bidea ondo ezagutzen duelako, baina bidea ezagutzen ez duenarentzat ez dela samurra dio. Dagoeneko landatu ditu berriro ere haritz-landareak: "Lehen, landatu nituen takodunak, urtebeteko landareak. Horiek samur atera daitezke lurretik eta beste nonbait sartu. Orain, berriz, haziagoak landatu ditut, eta zailagoa da ateratzea. Izan ere, lurretik ateratzen badituzu, zuztarra hondatu daiteke eta ez dute balio berriro ere landatzeko".