Euskal antzerkilari amateurrei eta debagoiendarrei zuzendutako sormen egonaldia antolatu du DAP Debagoieneko Antzerki Plataformak, Next Generation: Gipuzkoako hiri-eremuetatik kanpoko kultura eskaintza zabaltzeko eta dibertsifikatzeko laguntzari esker, Antzuolako Udalarekin lankidetzan.
Eider Sanz eta Amaia Santamaria debagoiendarren Atalak proiektua da aukeratuetako bat; gaur hasiko dira martxan. Horrez gainera, Amaia Bono gasteiztarraren Belarriprest proiektua ere hautatua da, eta martxoaren 20tik 23ra bitartean egingo du egonaldia. Ondoren, martxoaren amaiera aldera, sortze prozesuen irekiera egingo dute.
Irekiera prozesuak
Proiektu guztiek prozesu irekiera proposamen bat egin behar dute, eta plataformak, sormena bultzatzeaz gain, helburu du prozesuak herriari zabaltzea. Bada, horregatik egingo dituzte irekierak jendaurrean, Behatxulo 2023 programan.