Etorkizuna Orain erakusketan Ione Larrañaga antzuolarraren irudiak daude ikusgai, beste bost artistenekin batera. Gipuzkoako Foru Aldundiak eta Etorkizuna Eraikiz-ek abian jarritako jarduketa plan batean ondutako lana da, eta Donostiako Gipuzkoa Plazan egongo dira lanak ikusgai martxoaren 15era arte, "lurraldearen etorkizuna" ilustratzeko.
Larrañagak trantsizio ekologikoa, ingurumena eta biodibertsitatea jorratu ohi ditu bere ilustrazioetan. Haren arabera, natura "etengabeko mugimendua da", amaierarik ez duen aldaketa. "Gu ere materia horrekin eginda gaude eta horixe bera islatu nahi nuen nire lanean".
Ilustrazioen berezitasuna
Eider Mendoza Gobernantzako diputatuaren arabera, "interesgarria eta bitxia da" ikustea nola artista bakoitzak, bere ikuspuntu eta estilo pertsonaletik, orri zuri batean hainbat kontzeptu islatu ditzakeen. Hala, euretako bakoitza "berezia" dela dio, euren artean desberdinak eta originalak. "Hausnartzera eta irakurketa ezberdinak ateratzera gonbidatzen gaituzte, guztion bizitzan eragina duten etorkizuneko gaien eta erronken inguruan".
