Ibai Larrea antzuolarrak errekorra ondu du beste behin, iaz ere hala egin baitzuen, ordubete eta 51 segundotan helmugaratuta, iaz baino bi minutu gutxiagoan. Eta, horrenbestez, lehena izan da gizonezkoetan. Mayi Mujika urretxuarrak, berriz, lehen aldia izan du Antzuolako 8 Miliak lasterketan, eta garaile izan da emakumezkoetan, ordubete, hemeretzi minutu eta 33 segundorekin.
Bigarren eta hirugarren sailkapenei dagokienez, Larreak hurrenez hurren izan ditu Iñigo Alzola arrasatearra (1:04:36) eta Aitor Ajuria otxandiarra (1:05:12). Emakumezkoetan, Mujikaren ostean iritsi dira helmugara Irati Larrañaga usurbildarra (1:20:58) eta Garazi Abasolo aretxabaletarra (1:21:35).
Larreak, gainera, lehena izateaz eta errekorra ontzeaz gainera, antzuolar onenaren saria ere irabazi du gizonezkoetan. Aldiz, emakumezkoena, Ainize Lizarralderentzat izan da, 1:36:30 markarekin.
Hala ere, emaitzez harago, izan da beste marka bat ere. Izan ere, ibilbidean zehar, bi urdaiazpiko jarri dituzte antolatzaileek, hartzera animatzen ziren emakume eta gizonezko banarentzat. Hala, Iker Agirregabiria aretxabaletarra eta Ainhoa Aspiazu bergararra helmugaratu dira urdaiazpiko bana gainean hartuta.
Gazteen lasterketa
2007 eta 2013 urteen artean jaiotako gaztetxoentzako bost kilometro inguruko lasterketa antolatu dute lehen aldiz. Helduena baino hamar minutu lehenago hasi da, 10:20 aldera, eta 24k hartu dute parte. Julen Badiola bergararrak 24 minutu eta segundo bakarrean egin du lasterketa eta Nora Larrea bergararrak, berriz, 31 minutu eta 49 segundotan. Hala, biak izan dira garaile sailkapen orokorrean. Herritarren kategorian, ordea, Lier Arangurenek eta Izadi Sudupek egin duten lehenengo.
