Beste aldi batzuetan bezala, egubakoitzean ere kulturaz gozatzeko aukera izango da Antzuolako gaztetxean, bertso saioa eta kontzertua antolatu baitituzte iluntzetik aurrera.
Mikel Iturriotz, Garazi Navarro eta Asier Galarza bertsolariak arituko dira bertsotan, 20:30ean hasita, gaztetxean bertan, baina 19:00etan irekiko dituzte ateak, lehenago bertaratu nahi duenarentzat.
Bertsolariek amaitzean, berriz, kontzertuak hartuko du lekukoa. Tabu bikote akustiko arrasatearra igoko da oholtza gainera.
Lapurretaren berri
Horrez gain, Antzuolako Gazte Asanbladako kideek salatu dute lapurreta jasan zutela joan den astean, eta ez dela lehen aldia izan, gainera. Barruko gauza batzuk ostu dituzte, eta garrantzitsutzat jo dute herri jakinaren gainean jartzea. "Gure borondate guztiarekin gabiltza lanean, eta horrelako jarduera desegokiek motibazioa galtzera besterik ez gaituzte eramaten".