Ione Larrañaga eta Oier Peñagarikano antzuolarrek beste mural bat egin dute, udal pilotalekuko sarrera nagusian. Bi esku ageri dira, eta erdigunean esku pilotako pilota bat; luze eta motz erreferentziak ere badaude.
Alabaina, ez da lehen aldia leku horretan horma-irudi bat egiten dutena, aurrez beste bat baitzegoen. 2021eko abenduan egin zuten bi sortzaileek, baina iazko maiatza inguruan pintaketak egin zituzten gainean, eta ondorioz, irudia kaltetu egin zuten.
Beraz, Udalak espero du murala "denek zaintzea, inork ez hondatzea eta bakean uztea".
Proiektuaren barne
Pilotalekuko horma-irudia, ordea, ez da herrian egin duten bakarra, Larrañagak eta Peñagarikanok muralgintza proiektu bat abiatu baitzuten 2021ean. Bederatzi lanek osatzen zuten hasieran, eta orduko ideia zen mural guztiak batuko zituen ibilbide bat sortzea, horma-irudi bakoitzari QR-a eranstearekin batera.
Bada, eginak dituzte proiektu horren parte ziren muralak, eta horma berrien bila ere hasiak ziren horma-irudi gehiago egiteko, bloke edo etxeetan.