Zapatuan, hilaren 14an, hasiko da Antzuolako Mus Txapelketa. Hiru kanporaketa jokatuko dira guztira, eta azkenik, finala egingo da.
Mox tabernan izango da lehen kanporaketa, 16:30ean. Parte hartu ahal izateko, bikoteek jokatu nahi duten lekuan eman behar dute izena, 20 euroren truke. Bikote bakoitzak kanporaketa bakarrean jokatu ahalko du, eta kanporaketa egiteko, gutxienez, lau bikotek eman behar dute izena. Areago, antolatzaileek jakinarazi dute antzuolarrez gain, herriko senideek edo Antzuolan lan egiten duten kanpotarrek ere hartu dezaketela parte txapelketa honetan. Ordea, bikoteko antzuolar bat behintzat egon behar da.
Bigarren kanporaketa, berriz, urtarrilaren 20an egingo da, 22:30ean, Gailur tabernan, eta hirugarrena, Arin jatetxean izango da, urtarrilaren 28an, 16:30ean. Azkenik, finala Ongi Etorri jatetxean egingo dute, otsailaren 5ean, 16:30ean, eta lau erregetara jokatuko dela azaldu dute, aurrez egingo diren kanporaketetan bezala.
Euskal Herrikorako sailkapena
Ez da jakinekoa nor iritsiko den finalera, eta ezta zenbait bikotek jokatu duten ere, aurrez kanporaketetan aritutakoen arabera erabakiko baita. Hala ere, aurreratu dutenez, egunean bertan txapelak jantziko zaizkie txapeldunei, beste hainbat sari ere banatuko dituzte, eta parte hartzaile guztien artean opari bat ere zozkatuko da. Gainera, bertan esango da zein antzuolarrek hartuko duen parte Euskal Herriko Mus Txapelketako Gipuzkoako kanporaketan ere.
