Antzuolako Hiri Antolamendurako Plan Orokorra, HAPO-a, garatzeko partaidetza prozesua abian da jada, eta dagoeneko talde eragilean aritu dira lanean zenbait herritar.
"Saio honetan Antzuolako Ingurunearen, mugikortasunaren eta hainbat arloen argiuneak eta hobetzekoak identifikatu dituzte, etorkizunera begirako erronkak irudikatzen hasi gaitezkeelarik", jakinarazi du Udal Gobernuak.
Hala, prozesuarekin jarraitzeko, martxoaren 15ean, martitzena, partaidetza saio zabala egingo da herrian, eta bertan parte hartzeko gonbidapena egin dute: "Zure ekarpena interesgarria izan daitekeela uste dugu. Saio zabal honen helburua da Plan Orokorra zer den azaltzea, nolako tramitazioa izango duen eta zein nolako prozedura abiatu den honen idazketarako. Ondoren, talde teknikoak talde eragilearekin batera egindako aurre-diagnostikoa aurkeztu egingo dugu partaideek osa dezaten".
Prozesu hau aurrera eramateko orduan, saioak bideratu eta herritarrekin hausnarketa eta lanketa konpartitua egiteko Hiritik At-en laguntza izango da.