Eguazten goizean txertatu zituzten Antzuolako Eguneko Zetroko 12 egoiliarrak –hiru gizonezko eta bederatzi emakumezko–. Guztiek, beso banatan, gripearen dosia eta COVID-19aren aurkako hirugarren dosiak jaso zituzten. "Desiratzen zeuden eta beldurrik gabe, gainera. Dena ondo joan da eta protokoloak hala eskatuta, beso banatan, txerto bana jaso dute. Eta, gaur, egubakoitza, gripearen aurkako txertoa langileok jasoko dugu", kontatu du zentroko arduradun Beatriz Guelbenzuk.
Normaltasuna
Osasun egoerak izan duen bilakaerak, ohikotasunerako urratsa ematen lagundu die eguneko zentroko egoiliarrei. "Taldeko jarduerak, irteerak, eskolan egiten zituzten belaunaldien arteko topaketak, Nagusilaneko bolondresen bisitak, dutxa zerbitzua... pixkanaka-pixkanaka guztia berreskuratzen joan gara. Ez dakizue nolako ilusioa egiten dieten egoiliarrei berriro elkarrekin espazioak elkarbanatu, eta komunikazioa edukitzea; behar handia zuten", aitortu du Beatriz Guelbenzuk.