Azaroaren 6an, zapatua, Antzuolako Rock Eguna ospatuko dute. Herriko musikariak izango dira protagonista, eta hainbat estilo entzuteko aukera izango da, Zurrategi plazan, gaueko bederatzietan hasita. Esandako moduan, herriko musikariek eta sortzaileek izango dute ahotsa: Spinalonga, Patxi Luke, Udazken taldea, Irati Jauregi eta Irati Gardoki, Ainhoa eta Nahia, Koldo eta Irati Lizarralde, eta Lemak, besteak beste.
Rock-and-roll gauaz gozatzeko dei egin diete antolatzaileek herritarrei. "Jaialdi honek aspaldian Aitz Garbi tabernan egindako musika jaialdi bat dauka abiapuntu. Eta, hain zuzen, elkarlanean, musikarekin harremana zuten herritarrek antolatutako emanaldia izan zen orduko hura. Hala, hau ere herritar talde baten iniziatibaz antolatu dugun jaialdia izango da eta herritar ororendako irekia egongo da", argitu du antolatzaile lanetan dabilen Mikel Bargielak.
