2020an ezin izan zuten asanbladarik egin pandemiaren eraginez, eta zapatuko hitzorduan, 2019 eta 2020an, martxoko konfinamendu data bitartean, egindako ekintzak gogoratu zituzten eta urte horietako diru kontuak aurkeztu eta onartu. Eta lokala itxi ondoren egin ziren aurrez-aurreko eta Internet bidezko bilera eta ekintzak ere aipatu zituzten.
2021erako egitasmoa eta aurrekontua ere aurkeztu zuten. Izan ere, Landatxopek oraindik lokala itxita eta ekintza gehienak bertan behera dituen arren, ez du itxaropena galtzen eta, ahal den neurrian, joango da normaltasuna eskuratzen, hori bai, beti osasuna lehenetsita.
Egoitza eredua aldatu nahian
Denbora honetan zaharren egoitzetan izan diren arazoak gogoratu eta aztertu ziren asanbladan. Egoitzak ez daude gertatu den arazoari erantzuteko prestatuta, ez antolaketan, ez baliabide pertsonal eta materialetan. Tamalez, pertsona nagusi asko geratu dira bidean eta horrek egoitza eredua aldatze aldera konpromiso bat exijitzen digu, bai nagusien elkarteei, erakundeei eta gizarte osoari. Landatxopek uste du lan asko dagoela egiteko: bestelako egoitza eredua ikusten baitute behar-beharrezkoa.
Pentsioez jardun zuten
Pentsioen gaiak ere izan zuen bere lekua. Landatxoperen esanetan une garrantzitsua da hau pentsio duinen aldeko mobilizazioari eusteko, Europa eta finantza-sektorea eta enpresaburuen zirkulua, besteak beste, gobernua presionatzen ari dira, gaur egun pentsiodun garenon lanari eta mobilizazioari esker hamarkadetan zehar eskuratu ditugun eskubideak murriztu daitezen. Horregatik Landatxopek bat egiten du maiatzaren 29an Donostian egingo den manifestazioarekin. Eta, bereziki, dei egiten die pentsiodun eta herritar orori zapatuan, 12:00etan, plazan izango den elkarretaratzean parte har dezaten.
Juntako kide berriak
Amaitzeko, 2020 eta 2021eko juntakide aldaketak onartu ziren. 2020an Mª Nieves Zabalo, Lorentzo Iturbe eta Iñaki Elorza sartu ziren Zuzendaritza batzordean. 2021ean, berriz, Jose Anjel Arbulu, Claudia Alvarez eta Avelino Martínez ditugu batzordekide berriak.