Gazta salmenta postuak, gozoenak –honek izan ditu ilara handienak–, janzteko osagarrienak –bertan nola egiten zituzten ikusteko aukera egon da, gainera–, panpinak eta antzerakoak, txotxongiloak, jostorratzez egindakoak, zumitzezko lanak –lanean ikusteko aukerarekin, kasu honetan ere–, laminak... postu asko ez baina askotarikoak izan dira San Isidro eguneko azokan, Antzuolan.
Eguraldiak ere lagun egin du azkenean, eta ikusi eta entzundakoen arabera, saldu ere polito egin dute, ezer saltzekorik zutenek –ez ziren denak–. Jendea polito ibili da goizean Antzuolan.
Mikel Bargiela zinegotzia gustura zen goizak emandakoarekin: "Ez da betiko feria egin, baina herriko artisau eta ekoizleei protagonismoa eman nahi genien eta lehen sektorea aste osoan zehar kaleratu eta bistaratzea, eta pozik gaude. Egoera ez da onena, hala tokatu da aurten ere egitea, ea datorren urtean betiko moduko ospakizuna egiteko aukera dugun".
Txorimalo lehiaketa ere egin dute, eta ondorengo argazkietako hiruak izan dira saritutakoak, jendearen gustukoenak.
