Bihar, maiatzak 15, baserritarren eguna da, San Isidro. Horren bueltan hasi dira antzuolarrak nekazaritzaren eta abeltzaintzaren inguruko gaiak mahai gainean jartzen eta hausnartzen. Martitzenean, esaterako, Aritz Ganboa artzain arruazuarrak solasaldia eta Bideak filmaren emanaldia eskaini zuen Torresoroan. Landa eremuko bizimodua eta kultura aldarrikatzeko ikus-entzunezkoa da, eta bertan izan zen baita ere dokumentalaren zuzendari Xabier Unanua azalpenak ematen.
Baserritarren azoka
Guztira, hamaika ekoizle eta artisau antzuolarrek jarriko dute postua biharko azokan. Bertakoendako eta herriko ekoizleendako azoka izango dela azaldu du Udalak. 11:00etan, Alboradak txistulari taldeak girotuko ditu herriko kaleak.
'Ez da kasualitatea'
Umorea, musika, bertsoa, jolasa, gogoeta eta emakumeen arteko konplizitatea uztartzen dituen bertso-saio musikatua egingo da bihar, 18:30ean, patioan. Onintza Enbeitak, Alaia Martinek, Maialen Arzallusek eta Oihana Iguaranek jardungo dute bertsotan. Sarrera 10 euro da.
Emakume baserritarrak
Lehen sektorea ardatz duen asteari amaiera borobila emateko, emakume baserritarrak oinarri dituen Erroa eta geroa dokumentala izango da ikusgai hilaren 17an, Torresoroan, 18:30ean. Gogoan izan behar da ekitaldi guztietara joateko sarrerak eskuratu behar direla ohiko bideen bitartez.